Ubwongereza: Rurageretse hagati ya Minisitiri w’Intebe, Inteko n’Urukiko rw'ikirenga!

 Inshamake   Urukiko rw'ikirenga mu Bwongereza rwemeje ko icyemezo cya Minisitiri w'intebe Boris Johnson cyo guhagarika imirimo y'inteko ishingamategeko kitakurikije amategeko.

Ubwongereza: Rurageretse hagati ya Minisitiri w’Intebe, Inteko n’Urukiko rw'ikirenga!

 Inshamake   Urukiko rw'ikirenga mu Bwongereza rwemeje ko icyemezo cya Minisitiri w'intebe Boris Johnson cyo guhagarika imirimo y'inteko ishingamategeko kitakurikije amategeko.

Umusare - Amakuru mu buryo utamenyereye.

Mu ntangiriro z'uku kwezi kwa Nzeri, nibwo Bwana Johnson yahagaritse inteko mu gihe cy'ibyumweru bitanu, aho yavugaga ko ari ukugira ngo bihe umwanya ijambo ry'umwamikazi kugira ngo Bwana Johnson atangaze gahunda nshya za leta ye, ariko abamunenga bavuga ko yari agamije gukumira abadepite ngo batagenzura gahunda ye yo gukura Ubwongereza mu muryango w'Ubumwe bw'Uburayi ; gahunda izwi ku izina rya 'Brexit'.

Minisitiri w'intebe w'Ubwongereza, Boris Johnson yahagaritse inteko mu gihe cy'ibyumweru bitanu, abamunenga bavuga ko yari agamije gukumira abadepite ngo batagenzura gahunda ye yo gukura Ubwongereza mu muryango w'Ubumwe bw'Uburayi.


Urukiko rw'ikirenga rwavuze ko bitari byo ko inteko ibuzwa gukora inshingano zayo mu gihe hitegurwa ko Ubwongereza buva mu muryango w'Ubumwe bw'Uburayi ku itariki ya 31 Ukwakira 2019, mu gihe Ibiro bya Minisitiri w'intebe bizwi nka Downing Street byatangaje ko ubu biri kwiga ku cyemezo cy'urukiko.


Asoma umwanzuro w'urukiko rw'ikirenga, Lady Hale, umukuru w'urukiko rw'ikirenga, yagize ati

Ingaruka [zo guhagarika inteko] ku ishingiro ry'ibigize demokarasi yacu yari ikabije. Icyo cyemezo nticyakurikije amategeko kuko cyari kigamije kubangamira cyangwa kubuza inteko kugira ubushobozi bwo gukora imirimo yemererwa n'itegekonshinga kandi nta gisobanuro cyumvikana gitanzwe.


Umucamanza Lady Hale yavuze kandi ko icyo cyemezo cyafashwe n'abacamanza 11 b'urukiko rw'ikirenga bose nta n'umwe uvuyemo, aho bemeje ko uko guhagarika inteko kuburijwemo kandi ko nta gaciro gufite, ndetse ubu abakuru b'inteko ari bo bagiye gukora ikizakurikira.

Lady Hale, umukuru w'urukiko rw'ikirenga asanga icyemezo cya  Boris Johnson kitarakurikije amategeko kuko cyari kigamije kubangamira no kubuza inteko kugira ubushobozi bwo gukora imirimo yemererwa n'itegekonshinga.


Umukuru w'inteko John Bercow yakiriye neza iki cyemezo cy'urukiko, avuga ko inteko igomba guterana bidatinze, guhera kuri uyu wa Gatatu tariki 25 Nzeri 2019 saa tanu n'igice z'amanywa ku isaha yo mu Bwongereza, anongeraho ko ubu agiye kuvugana n'abakuru b'amashyaka nk'ikintu cyihutirwa cyane.

Umukuru w'inteko John Bercow yakiriye neza iki cyemezo cy'urukiko, anavuga ko inteko igomba guterana bidatinze kandi ko agiye kuvugana n'abakuru b'amashyaka byihuse.


Ni mu gihe  Jeremy Corbyn, umukuru w'ishyaka ritavuga rumwe n'ubutegetsi rya Labour, yavuze ko ubu Bwana Johnson akwiye gukora igikwiye akegura ku butegetsi, naho Umunyamakuru wa BBC Clive Coleman ukurikiranira hafi ibijyanye n'ubucamanza we yavuze ko iki cyemezo cy'urukiko rw'ikirenga cyagaragaje ko uko waba ukomeye kose mu Bwongereza niyo waba uri Minisitiri w'intebe utari hejuru y'amategeko.

Jeremy Corbyn, uyobora ishyaka ritavuga rumwe n'ubutegetsi rya Labour, asanga Bwana Johnson akwiye kwegura ku butegetsi. 

 

GIRICYO UBIVUGAHO


Iyi nkuru ntiravugwaho!