Hatangajwe abagize guverinoma nshya y’u Burundi barimo n’uwafatiwe ibihano!

 Inshamake   Nyuma yo kurahira kwa Perezida wa Repubulika, ibiro bya perezida w'u Burundi byatangaje abagize guverinoma nshya, biganjemo abava mu ishyaka riri ku butegetsi, hafi 30% ni abagore, mu gihe umwe muri bo yafatiwe ibihano na Amerika n'ubumwe bw'uburayi.

Hatangajwe abagize guverinoma nshya y’u Burundi barimo n’uwafatiwe ibihano!

 Inshamake   Nyuma yo kurahira kwa Perezida wa Repubulika, ibiro bya perezida w'u Burundi byatangaje abagize guverinoma nshya, biganjemo abava mu ishyaka riri ku butegetsi, hafi 30% ni abagore, mu gihe umwe muri bo yafatiwe ibihano na Amerika n'ubumwe bw'uburayi.

Umusare - Amakuru mu buryo utamenyereye.

Guverinoma y'u Burundi yari isanzwe igizwe n'abaminisitiri 23, iyatangajwe mu ijoro ryacyeye igizwe na 16 (ushyizemo na Minisitiri w'intebe), hakaba harimo batandatu bari basanzwe muri guverinoma.

Guverinoma yashyizweho nyuma yo kurahira kwa Perezida Evariste Ndayishimiye, Perezida mushya w'u Burundi.

Kimwe na Minisitiri w'intebe, undi utavugwaho rumwe waje muri guverinoma ni komiseri wa Polisi Gervais Ndirakobuca wamenyekanye mu gukoresha imbaraga mu kurwanya abigaragambya mu 2015, byanatumye leta ya Amerika n'umuryango w'ubumwe bw'uburayi bifatira ibihano Bwana Ndirakobuca wagizwe Minisitiri wa minisiteri ebyiri zafatanyijwe; iy'ubutegetsi n'iy'umutekano.

Abandi bavugwa cyane muri guverinoma nshya ni Amb. Albert Shingiro wari usanzwe ahagarariye u Burundi mu muryango w'abibumbye ubu wagizwe minisitiri w'ububanyi n'amahanga, Dr Domitien Ndihokubwayo, inzobere mu by'imari n'ubukungu wari minisitiri w'imari kuva mu 2016 yagaruwe muri uyu mwanya, naho Ir Alain Tribert Mutabazi umuhanga mu byo kubaka wari buramatari w'intara ya Kirundo ubu yagizwe Minisitiri w'ingabo n'abavuye ku rugamba.

Komiseri wa Polisi Gervais Ndirakobuca wamenyekanye mu gukoresha imbaraga mu kurwanya abigaragambya mu 2015, ni umwe mu bavugwaho rumwe kuko yanafatiwe ibihano.

Itegekonshinga ry'u Burundi riteganya ko guverinoma iyoborwa na Minisitiri w'intebe, abayigize batagomba kurenga 60% b'Abahutu na 40% b'Abatutsi, abagize iyatangajwe BBC dukesha iyi nkuru ntiramenya amoko yabo, mu gihe Perezida wa Repubulika, Ministiriri w'intebe, Minisitiri w'ingabo, Minisitiri w'umutekano n'ubutegetsi bw'igihugu bose bava mu ishyaka rimwe, naho abagore batanu bashyizwe muri guverinoma bahawe Minisiteri z'Ubutabera, Umurimo n'abakozi, Ubucuruzi n'ubukerarugendo, Imibereho myiza n'uburenganzira bwa muntu, hamwe n'iy'Itumanaho.

 

Mu bagize iyi guverinoma abagera kuri 13 muri 16 bakomoka mu ishyaka CNDD-FDD riri ku butegetsi, nta urimo uva mu ishyaka CNL ryari rihanganya bikomeye mu matora na CNDD-FDD.

 

CNL yahakanye ibyavuye mu matora yo mu kwezi gushize, abadepite bayo mu nteko ishingamategeko ntibitabiriye amatora yo mu nteko yashyizeho Minisitiri w'intebe, Alain Guilaume Bunyoni.

Minisitiri w'intebe, Alain Guilaume Bunyoni ntiyatowe n'abadepite bo muri CNL yahakanye ibyavuye mu matora yo mu kwezi gushize, cyane ko banze kwitabira ayo matora ya Minisitiri w'intebe. 

Kuba Minisiteri y'ubutegetsi bw'igihugu yahujwe n'iy'umutekano bigahabwa Gervais Ndirakobuca bamwe bavuga ko ari ikimenyetso ko hashobora kudahinduka byinshi mu butegetsi n'umutekano, dore ko mu bihe bishize uruhande rutavuga rumwe na leta n'abaharanira uburenganzira bwa muntu bashinje Imbonerakure ibyaha bakorera abatavugarumwe n'ubutegetsi, kandi ngo ntibakurikiranwe.

 

Mu gihe u Burundi bukeneye kuzahura umubano n'amahanga, cyane cyane ibihugu bikomeye, Amb. Albert Shingiro yaba azanywe muri guverinoma kubera ubunararibonye bwe mu muryango w'abibumbye (UN/ONU) aho ashobora gufasha mu biganiro n'ibyo bihugu bikomeye, ibi bikaba byari byarananiye Amb. Ezéchiel NIBIGIRA wahoze ashinzwe iyi Minisiteri akaba yarigeze kuba Ambasaderi w'u Burundi muri Kenya, we yagizwe Minisitiri ushinzwe umuryango wa EAC hamwe na siporo n'umuco.

Amb. Albert Shingiro wari uhagarariye u Burundi mu muryango w'abibumbye (UN/ONU), yitezweho kuzahura umubano n'amahanga.

Kugumisha Dr Domitien Ndihokubwayo muri Minisiteri y'imari bakanamwongeraho igenamigambi, ni ikintu gikomeye mu gihe u Burundi bwahagarikiwe inkunga n'ibihugu bikomeye, Bwana Ndihokubwayo wize mu Budage, ni inzobere mu by'imari ushobora kugira impinduka akora no ku rwego rw'ibiganiro n'abaterankunga.

Uru ni urutonde rw'abagize Guverinoma nshya y'u Burundi na Minisiteri bayoboye.

 

GIRICYO UBIVUGAHO


Iyi nkuru ntiravugwaho!