Abagera kuri 767 bamaze gufatirwa mu bwambuzi bushukana bwatwaye amafaranga abarirwa muri miliyoni 15!

 Inshamake   Hashize iminsi hirya no hino mu gihugu humvikana abantu bihererana abandi bakabambura amafaranga babizeza akazi cyangwa kuzabajyana mu mahugurwa mu mahanga cyangwa kubabonerayo akazi, abandi bagahamagarwa ku matelefoni babwirwa ko batsindiye amafaranga n’ibindi bihembo ahantu runaka.

Abagera kuri 767 bamaze gufatirwa mu bwambuzi bushukana bwatwaye amafaranga abarirwa muri miliyoni 15!

 Inshamake   Hashize iminsi hirya no hino mu gihugu humvikana abantu bihererana abandi bakabambura amafaranga babizeza akazi cyangwa kuzabajyana mu mahugurwa mu mahanga cyangwa kubabonerayo akazi, abandi bagahamagarwa ku matelefoni babwirwa ko batsindiye amafaranga n’ibindi bihembo ahantu runaka.

Umusare - Amakuru mu buryo utamenyereye.

Muri uyu  mwaka  wa 2019  gusa  abantu bagera kuri 767 bamaze gufatirwa mu byaha by’ubwambuzi bushukana, bakaba  barambuye amafaranga abarirwa muri Miliyoni 15 z’amafaranga y’u Rwanda, aho Polisi y’u Rwanda ku bufatanye n’izindi nzego z’umutekano  bahagurukiye  kurwanya ubu bwambuzi.

 

Umuvugizi wa Polisi y’u Rwanda ,  Commissioner of Police (CP) John Bosco Kabera,  avuga ko abakora ubwambuzi bushukana bakoresha amayeri menshi atandukanye kugira ngo bagere ku mugambi wabo.

 

CP John Bosco Kabera yagize ati

Bakoresha amayeri menshi aho hari abirirwa bazenguruka mu mazu acuruza serivisi za murandasi(Cyber Café) bakareba niba hari abantu bibagiwe gufunga imeli zabo(email) cyangwa  ko hari abibagiwe gufunga amadosiye yabo bagaherako batwara imyirondoro  bakazahamagara cyangwa bakamwandikira.  Hari n’abahamagara abantu bakababwira ko batsindiye amafaranga runaka muri tombora y’ibigo by’itumanaho ariko kugira ngo bazabone ayo  mafaranga cyangwa ibihembo batsindiye  bakababwira ko  bagomba kugira amafaranga batanga.

CP John Bosco Kabera avuga ko abakora ubwambuzi bushukana bakoresha amayeri menshi atandukanye kugira ngo bagere ku mugambi wabo.

Imibare itangwa n’urwego rw’igihugu rw’ubugenzacyaha (RIB) igaragaza ko kuva uyu  mwaka wa 2019 watangira  bakiriye ibirego  bigera kuri 446 bijyanye n’ubwambuzi bushukana, abantu 767 bakaba bamaze gufatirwa muri ibyo byaha.  Raporo kandi igaragaza ko  muri icyo gihe cyose aba bajura bamaze kwambura abantu  amafaranga  y’u Rwanda  abarirwa muri miliyoni cumi n’eshanu(15,000,000).

 

Umuvugizi w’urwego rw’Igihugu rw’ubugenzacyaha (RIB), Umuhoza Marie Michelle  avuga  ko  ibirego byinshi biba bijyanye n’abantu bavuga ko bashutswe ko batoranyijwe kujya mu mahugurwa mu mahanga cyangwa bagahamagarwa babwirwa ko batsindiye amafaranga cyangwa ibihembo bihenze mu bigo by’itumanaho.

 

Umuhoza yagize ati

Hari abazana ibirego  bijyanye  no kuba barashyize amafaranga  yabo mu bigo bikoresha amafaranga mu buryo bwa murandasi (crypto-currency scams; conmen), aho bababwira ko bazabungukira inshuro nyinshi z’ayo bazaba bazanye.  Hari abakoresha inyandiko mpimbano biyita abayobozi  mu bigo bikomeye bagashuka abantu  ngo bajye bazana ibikoresho muri ibyo bigo babahe amafaranga cyane cyane baba babasaba kuzana ibikoresho by’ikoranabuhanga, ibyuma by’amamodoka n’ibindi.

 

Yakomeje avuga ko hari n’abagendana ibipapuro bakase neza  bakomekaho amadolari y’Amanyamerika wabona ibyo bipapuro ukagira ngo ni mazima, bakagushuka ngo bagiye kukuvunjira ahubwo bakaba baguhaye ibipapuro bitabara.

Umuhoza Marie Michelle  avuga  ko  ibirego byinshi biba bijyanye n’abantu bavuga ko bashutswe.


Ni mu gihe umuvugizi wa Polisi y’u Rwanda CP John Bosco Kabera  asaba abanyarwada kuba maso bakwirinda umuntu wese uza abashukisha ibitangaza, dore ko bakoresha amayeri menshi bigira abagira neza.

 

Yagize ati

Abantu bagomba kumenya ko ibyo tuvuga ari ukuri, ubwambuzi bushukana buriho ndetse cyane, barimo kwihuriza mu matsinda atandukanye bagakoresha amayeri menshi yo kwambura abantu. Nihagira uguhamagara akubwira ko watsindiye ibihembo runaka ntukamwemerere.

 

Yakomeje ashishikariza abanyarwanda kujya babanza gushishoza ibyo babwiwe bakirinda guhita bemera ibyo umuntu wese ababwiye kuko bariya bambuzi baba barafashe  umwanya wo kwiga ku muntu bagiye kwambura, bakamenya aho  afite intege  nkeya bakaba ariho bahera bagushuka bakakwambura, yabasabye kujya bihutira gutanga amakuru  hakiri kare ku nzego z’umutekano.

Ngo hari abirirwa bazenguruka mu mazu acuruza serivisi za murandasi(Cyber Café) bakareba niba hari abantu bibagiwe gufunga imeli zabo(email) cyangwa abibagiwe gufunga amadosiye yabo bagaherako batwara imyirondoro  bakazabahamagara cyangwa bakabandikira.

Abantu kandi bagirwa inama yo kujya bihutira guhamagara Polisi y’u Rwanda cyangwa urwego rw’igihugu rw’ubugenzacyaha (RIB) igihe hari umuntu baketseho kuba ari mu bikorwa bw’ubwambuzi bushukana. Bakaba bahamagara kuri telefoni zikuriki: 112 (iza Polisi y’u Rwanda) naho RIB bakitabaza 166. Bashobora no guhamagara  kuri  0788311152, 0788311829 bakaba bahabwa ubufasha bwihuse.

 

Urwego rw’ubushinjacyaha buvuga ko umubare munini w’abafatirwa muri ibyo byaha bahamwa n’ibyaha bagahabwa ibihano  bitandukanye mu gihe hari n’andi madosiye arimo gukirikiranwa  mu bushinjacyaha.

 

Itegeko nº68/2018 ryo ku wa 30/08/2018 riteganya ibyaha n’ibihano muri     rusange  mu ngingo yaryo ya  174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW).  

 

Iyo icyo cyaha gikozwe n’umuntu kugira ngo atange impapuro z’inyemezamigabane, z’inyemezamyenda, inyandiko zigereranywa n’amafaranga, imigabane cyangwa indi nyandiko yose ifite agaciro k’ifaranga ari ibya sosiyete y’ubucuruzi, iby’ikigo gicuruza cyangwa iby’uruganda, igihano kiba igifungo kitari munsi y’imyaka itatu (3) ariko kitarenze imyaka itanu (5) n’ihazabu y’amafaranga y’u Rwanda arenze miliyoni eshanu (5.000.000 FRW) ariko atarenze miliyoni zirindwi (7.000.000 FRW).
 

GIRICYO UBIVUGAHO


Iyi nkuru ntiravugwaho!